Tag Archives: España

Momentos fantásticos

28 Luns Out 2013

Posted by in Si home si

≈ Deixar un comentario

Etiquetas

, , , , , , , , ,

Don Emilio Botín dixo que España está nun momento fantástico, e que chegan cartos a sacos de todas partes. Hai quen o toma a mal, recordando que en España hai seis millóns de parados (cinco millóns e medio, descontando ese medio millón que Soraya Saénz de Santamaría e so Soraya Sáenz de Santamaría sabe que defraudan, eles e as empresas que os contratan, claro), tres millóns de persoas viven con menos de 300 €/mes e doce millóns por debaixo do nivel da pobreza. O que pasa é o propietario do Banco Santander vive nun planeta propio, no que tamén hai tres dimensións e está sometido a lei da gravidade e a algunha outra que tamén rexe aquí, pero polo demais é un mundo semellante, pero soamente tanxente. Un mundo no que a xente pode presentarse con pantalón corto e de vermello dos pes á cabeza diante das autoridades do seu país, como el se presentou. Que sencillote, non?.

Seguir lendo →

Estes non eran os preparados?

27 Venres Xul 2012

Posted by in Si home si

≈ 1 comentario

Etiquetas

, , , , ,

Cando o partido que está no Goberno chegou ao Goberno, ou máis ben cando todos sabíamos que ían chegar ao Goberno, eles e os que daquela estaban no Goberno incluídos, había un rumor xeneralizado: “estes, polo menos, están preparados”. Estaban preparados porque se supón que a xente de dereitas sabe como manexar os asuntos dos cartos sen se poñer nerviosos, porque están afeitos a tratar con eles desde pequenos, como quen vive entre lobos no medio do bosque. E estaban preparados porque tempo tiveron a prepararse, que sabían que ían ganar con ben máis anticipación que o Real Madrid a Liga pasada. Pois menos mal que tiñan preparación e tempo, porque se os chega a coller de improviso, nestes momentos temos aos cascos azuis da ONU regulando o tráfico nos cruces, por falta de enerxía eléctrica para que funcionen os semáforos.

Seguir lendo →

Todos somos Urdangarin

09 Venres Mar 2012

Posted by in Si home si

≈ 2 Comentarios

Etiquetas

, ,

Uns máis que outros, e quizais algún case nada, pero todos somos Urdangarín. Non todos somos así de altos e ben plantados, non todos fomos uns ases do deporte, non todos demos feito unha carreira, e menos unha carreira nun sitio fino, e non todos casamos tan ben. Pero iso son cousas accesorias. Porque poñendo a man no peito, ou no peto, quen non faría presuntamente algo parecido ao que el presuntamente fixo, de verse no caso? Ou sexa, aproveitarse de ser quen era e quen é? (non poño presuntamente porque ese posto que tiña en Telefónica déronllo polo que llo deron)  Isto non quere dicir que estea avogando pola súa inocencia, ou pedindo clemencia no caso de que o condenen. Pero quero dicir que o que presuntamente fixo é algo que cadra na idiosincrasia española.

Seguir lendo →

O verao xa non é o que era

13 Martes Set 2011

Posted by in Si home si

≈ 3 Comentarios

Etiquetas

, ,

Non señor. Empezando porque antes non se lle chamaba “veranito” (por certo, por que non se fala de “otoñito” ou “inviernito”?). Antes a xente volvía do verao descansada, aínda que non tivera vacacións. Agora ata hai unha desas síndromes ás que botar a culpa de que ande un desganado de todo. Antes nos veraos non pasaba nada, e os xornalistas antigos (os que viviron antes, non os que escriben como antes) tiveron que inventar aquilo das “serpientes de verano”. Agora alguén que pasara as vacacións nalgún hipotético sitio sen conexión a internet é como aquel San Ero que se durmiu á sombra dun castiñeiro e cando acordou pasaran unha pila de anos. Vaste a calquera sitio do Caribe tan tranquilo, ou como moito, co vago temor de que se produza unha revolta, e cando regresas resulta que a revolta foi aquí, e cambiáronche a Constitución.

Seguir lendo →

O espello libio (ou a nosa Yamahiriya)

13 Martes Set 2011

Posted by in El País

≈ 1 comentario

Etiquetas

, , ,

Un post que debería ter posto aquí no seu día.

Aviso: os datos comparativos cos outros países do Magreb foron contundentemente cuestionados por amigos en Facebook, ou sexa que cóllanos con papel de fumar e denos por non lidos. A historia de Libia non o foi -cuestionada- e a comparación coa tradición democrática española, tampouco.

Michelle Obama e a caspa

15 Domingo Ago 2010

Posted by in Si home si

≈ Deixar un comentario

Etiquetas

, ,

Por moitas jeremiadas que proclamen determinados predicadores, ou Rajoy cando se pon estupendo, o drama real de España, e non outro, é que a pouco que rasques, sae a caspa. A cousa vén de vello e reactualízase permanentemente, e se non, pensen no circo Michelle Obama. Durante a segunda metade do século XX, mentres no mundo civilizado, particularmente en Europa, se formaba a primeira sociedade na que as vantaxes da modernidade, incluída a cultura, se poñían ao alcance da maioría, España era un cuartel no que, como moito, unha parte da poboación tiña pase pernocta. Por aí fóra xurdían os Beatles, o pop, o rock, o Mini e o chamado amor libre (as relacións sexuais entre adultos sen máis requilorios que o mutuo acordo). Aquí había que agardar meses por un 600, Mi jaca e Soy minero campaban en todas as radios durante anos e o único reto de apareamento permitido eran os paseos pola na rúa, na que as mulleres ían por un lado e os homes por outro. Os turistas que, aos poucos, foron vindo, máis que unha viaxe física acometían unha viaxe no tempo.

Seguir lendo →

Banderas al viento

13 Xoves Out 2005

Posted by in Si home si

≈ 7 Comentarios

Etiquetas

,

Moi ben, proba superada. Onte houbo enormes demostracións de amor á indisoluble unidade da nación española en Madrid e na Coruña. Alí, xente influída sen dúbida polo pensamento Losantos-Ibarra e enardecida pola presencia da cabra da Lexión, abrasaron a pitos e abucheos a Zapatero. Aquí produciuse un conflicto xeracional entre a terceira idade unionista e a mocidade segregacionista no que a policía tivo que terciar (a favor dos vellos, como era de prever). Parafraseando ó pensador orbital Aznar, onde non había un problema, demos creado un. Noraboa.

Seguir lendo →